އޭ ރީތި ކޮކާ!
2021-10-24 . Written by Yameen
އޭ ރީތި ކޮކާ! ކޮންއިރަކުންހޭ ބޮޑުވާނީ
ދޭހަށް ފިޔަތައް ހުޅުވާލާ ހިންދެމިލާނީ
.
ފިޔަތަކުގެ އަޖައިބުން ލޯތައް ކުރަމުން އާޝޯޚް
ތިޔަ ހަރަކާތުން ޖައްވު އެކީ ފަޅު ފިލުވާނީ
.
ވައިގައި ހުރި ތެތްކަމުގެ އަރާމުން ވެވި ތާޒާ
ގައިދެއް ނެތި އެ ފަޒާގެ ތެރޭ އުދުހި އުޅޭނީ
.
މާމަލުގެ ވަހާ ރަހަޔާ އަދި އޭގެ ތަފާތާ
މާހައުލު ދިރާސާ ކޮށްލާ ދަސްކޮށްލާނީ
.
ޖެހިގެން ނާޒުކު ފިޔަތައް ހޫނާއި އަވީގައި
ފިހިދާނޭތީ ހެއްޔޭ ތިޔަހެން އޮންނާނީ
.
އަންނާށެ! މި ހޫނާއި ފިނީގައިވެ ނަށާލަން
ދަންނާށެ! އުފާ، ހޯދިއްޔާ ނޫންހެ ލިބޭނީ
.
އައު އެންމެ ކަމެއް ނުމެ ދެކި، ދުނިޔޭން ފަރުދާ ވެވި
ޕިއުޕާގެ ދުލީގައި އޮވެހެއްޔޭ މަރުވާނީ